Ex-mayor sa Davao Oriental, patay sa ambush
Driver, 1 pang kasama sugatan
MANILA, Philippines — Patay ang dating alkalde sa bayan ng Cateel, Davao Oriental makaraang pagbabarilin kahapon ng umaga sa Davao City.
Dead-on-the-spot ang biktimang si Ex-Mayor Giselo Castillones habang isinugod sa Southern Philippines Medical Center ang mga sugatang sina Alma Manliguez Lozentes, isang negosyante at driver na si Junie Castro.
Sa inisyal na ulat ng pulisya, nangyari ang pamamaril dakong alas-10 ng umaga sa KM5 Buhangin, Davao City.
Nabatid na katatapos lamang kumain sa isang fast food chain si Castillones at dalawang nabanggit na kasama at nang sumakay na sila sa kotse ay saka sila nilapitan at pinagbabaril ng isa sa mga nakaabang na suspek gamit ang kalibre 45 na baril.
Agad tumakas ang gunman matapos makitang napuruhan ang dating mayor sakay sa naghihintay na motorsiklo.
Agad nagkasa ng hot pursuit operation ang otoridad laban sa mga suspek.
Si Castillones ay nagsilbing Mayor ng Cateel mula taong 1983-1986.
- Latest