WTE Project gikwestyon  kay way public hearing

CEBU, Philippines — Ang proponent sa proyekto sa Waste to Energy nga magsulbad sa problema sa basura ug enerhiya sa dakbayan gikuwestiyon sa pipila ka sakop sa Konseho sa Dakbayan sa Sugbo human sa kapakyas niini pagpahigayon og public hearing sa Barangay Guba sa wala pa makuha ang lote.

Kagahapon (Miyerkules) atol sa Executive session sa konseho sa dakbayan sa Sugbo, ang proponent sa WTE, New Sky Energy Philippines, nipresentar sa ilang kalambuan ug sa ilang timetable tungod sa 730 ka adlaw nga extension nga ilang gipangayo.

Ang nahabilin nga 365 ka adlaw, matud ni Konsehal Joel Garganera, chairman sa committee on environment, motutok sa pagkuha sa gikinahanglang mga dokumento ug permit sa pagsugod sa construction.

Kaniadto, si Garganera niingon nga ila nang nasuta ang mahimutangan sa maong proyekto. Atol sa diskusyon, gibutyag nga didto kini sa Barangay Guba, dakbayan sa Sugbo diin nakuha na ang lote nga gibana-banang 6.9 ka ektarya.

Si Konsehal Mary Ann Delos Santos, kinsa residente mismo sa Barangay Guba, nikwestiyon nganong napakyas ang Sky New sa pagpahigayon og public hearing sa wala pa makuha ang lote.

You did not comply with the public hearing in Barangay Guba, pagpangutana ni Delos Santos ngadto ni Attorney Raizaley Ligaray, Head Legal of New Sky diin iyang gitubag;  Not yet, but we will.

Gipasabot ni Ligaray nga gusto nila nga makasiguro sa project site ug midugang nga lisod ang pagpangita og lugar sa siyudad nga makatubag sa mga requirements sa proyekto.

Gitataw hinuon ni Ligaray nga ang maong proyekto magdala og oportunidad sa barangay sama sa mga trabaho ug giklaro nga dili kini makahatag og negatibong epekto sa kinaiyahan sama sa polusyon.

Hinuon si Garganera sa iyang habig miingon nga aduna silay kompiyansa sa pasalig nga ga environmentally-compliant ang proyekto.

Siya nidugang nga ang Barangay Guba nasayod sa maong proyekto ug midugang nga ang konseho sa barangay ug ang mga sakop sa Solid Waste Management Board kauban nila atol sa survey.

Hinuon si Delos Santos niingon nga nagpabilin lang siya sa basic principle ug niingon nga kinahanglang unahon kanunay ang mga pamilya.

The bottom line is, himoa una ang public hearing, matud ni Delos Santos.  (BANAT NEWS)