Walay swerte ang nasampolan

Gisikop sa kapolisan si Jayson de Roxas Taculog, usa ka gituohan nga large-scale smuggler sa sibuyas-bombay didto sa Batangas. Matud ni DA Secretary Laurel, Jr., sinugdanan lamang kini ug magpadayon ang DA sa pag-gukod sa mga smugglers ug mga economic saboteurs kay makaguba sila dili lamang sa panginabuhian sa mga mag-uuma, gipahimuslan usab nila ang mga konsumidor pinaagi sa taas nga presyo sa palaliton.  Hinaut nga dili lang kutob sa “sinugdanan” kining maong kampanya batok smuggling. Kay kon dili padayonon, aaw, walay swerte ang nasampolan.  Saoonz!

Daghan ra ang kusinero

Atol sa deliberasyon sa Senado sa 2024 budget sa Department of Science and Technology, gihimug-atan ni Senate Minority Leader Joel Villanueva ang “overlapping” nga mandato ug gimbuhaton sa DOST ug sa ubang ahensya sa kagamhanan.  Daghan ang rason ngano nga nahitabo nga adunay “overlapping functions.”  Apan bisan pa ni’ng maong kamatuoran, bisan sa nagdoble-doble nga budget, nagkulang man gihapon ang serbisyo sa kagamhanan ngadto sa katawhan.  Husto ang panultihon nga “Daghang kusinero makapa-aslom sa sabaw.”  Madahaan!

Hinganlan og “ito”

Segun sa monitoring sa Department of Agriculture, misaka na ang presyo sa galunggong ngadto sa P320 ang kilo, labaw og P40 sa miaging semana nga P280 lang ang kilo. Resulta na kini sa gipatuman sa BFAR nga pagdili sa pagpanagat kon closed fishing season diha sa Visayan Sea ug sa Zamboanga Peninsula sugod Nobyembre 15, 2023 hangtud Pebrero 15, 2024.  “Law of Supply and Demand” ang sagad pasanginlan kon motaas ang presyo sa palaliton.  Sugyot sa akong amigo, “Hinganlan lang og “ITO” ang galunggong, aron dili maapil sa fishing ban sa BFAR ug padayon gihapon ang pagpanagat niini.” Pagkatoytoy!

Wala’y kwalipikado’ng motudlo

Buot ni Cebu City Councilor Rey Gealon nga himoong kabahin sa school curriculum ang traffic education ug nga sugdan kini diha sa elementary level.  Ang maong sugyot sa konsehal giuyonan usab sa Traffic Management Coordination Committee.  Maanindot ang maong laraw bisan maingon nato nga ulahi na kaayo kita kabahin ni’ng maong lakang kon itandi sa ubang nasud. Angayan nga itudlo sa kabataan ang mga hustong lagda, dili lang sa trapiko, kon dili sa maayong pamatasan.  Apan nangutana ang akong amigo, “Kinsa ma’y kwalipikado’ng motudlo sa kabataan nga sagad sa mga hamtong mao man ang una’ng malapason?”  Fezteleern!

“Sukli sa gugma” – suportahan ‘ta

Adunay buhi’ng konsyerto nga giulohan og “SUKLI SA GUGMA” nga ipahigayon diha sa IC3 Convention Center, Barangay Mabolo, karong Nobiyembre 26, 2023, alas 7:00 ang takna sa gabii.  Ang maong konsyerto usa ka Christmas Fundraising nga gipasi-ugdahan sa AMRO, kon All-Terrain Medical Relief Organization, usa ka non-government organization, nga naglangkob sa mga medical professional volunteers ug mga magpapatigayon. Ang kita-on ni’ng maong konsyerto gamiton sa mga emergency relief assistance alang sa biktima sa mga kalamidad.  Gidapit ko ang tanan, labi na kadtong mahigugmaon sa huni ug awit, sa pagsaksi sa maong konsyerto.  Segurado ako nga malingaw ka na, mahimo ka pa’ng kabahin sa bulawanong kawsa. Mangadto ta ha!