UV Lancers 8-0 na

Twice-to-beat sa CESAFI Final Four

CEBU, Philippines — Ang defending champion University of the Visayas (UV) Green Lancers milampornas sa Cebu Roosevelt Memorial Colleges (CRMC) Mustangs, 89-57, aron inaton ang perpekto nilang ratsada ngadto sa 8-0 sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Dominggo didto sa Cebu Coliseum.

Bisan unsa pay resulta sa katapusan nilang duha ka duwa batok sa University of San Carlos (USC) Warriors ug University of Southern Philippines Foundation (USPF) Panthers, segurado na ang Lancers sa top 2 nga dunay twice-to-beat advantage sa giatngan nga Final Four.

Abante sa halftime, 41-27, ang Lancers miabli sa ikatulong kuwarter pinaagi sa pagkadlit og walo ka sagunson nga puntos aron padak-an ang ilang bentaha ngadto na sa 22 puntos, 49-27. Misamot pa ang kainit sa Lancers aron paburoton ang ilang labaw ngadto na sa 35 puntos, 89-54, sa pinal nga 44 segundos.

Si Kent Ivo Salarda maoy nangu sa Lancers uban ang 22 puntos, si Froilan Maglasang mi-iskor og 13 samtang sila si AJ Sacayan ug Jimpaul Amistoso miamot og 10 puntos matag usa.

Sa laing collegiate match-up, si Bryle Puntual mipupo og 18 puntos ug si James Gica midugang og 11 puntos sa dihang gibuntog sa USC Warriors ang Benedicto College Cheetahs, 50-41, aron pagpabuhi sa ilang tsansa nga makasud sa Final Four bitbit ang 5-4 nga baraha. Sa juniors division, si Geo Rey Lumagod miharos og 25 puntos samtang sila si Arnold Minoza ug Revo Lao nagkumboya'g 34 puntos sa dihang ang University of Cebu Lapu-Lapu and Mandaue (UCLM) nakalingkawas sa Cebu Institute of Technology-University (CIT-U) Baby Wildcats, 82-77, aron pagtikang sa semifinals sa labing unang higayon uban ang 8-1 rekord.

Samtang ang igsoon nilang UC Baby Webmasters nagmilagro human malubong og 15 puntos sa naghinapos nga bahin sa duwa aron pakgangon ang City of Bogo Science and Arts Academy (CBSAA) Trailblazers,  58-55.

Biya kaayo sa iskor nga 37-52 sa pinal nga sayes minutos, sila si Lourdonie Cuyos ug Gemini Abellana Jr. nagtambayayong paglusad sa mainit nga resbak sa Baby Webmasters sa ikaupat nga kuwarter diin ilang gilabhan ang Trailblazers, 21-4, nga nahimo nilang yawi sa impresibo nilang pagbalitok.

Tungod niini, ang Baby Webmasters nakapuwersa og triple tie uban sa UV Baby Lancers ug Cebu Eastern College (CEC) Dragons bitbit ang managsamang 6-3 nga marka sa sikit kaayong kumbati alang sa ikaupat ug katapusang luna sa semis.