Unang salang ng SMB sa Commish Cup
MANILA, Philippines — Kikilatisin ng San Miguel ang dati sanang import nito na si Thomas Robinson na nasa panig ng NLEX sa kanilang pagtutuos sa 2023 PBA Commissioner’s Cup sa Ynares Sports Center sa Antipolo City.
Aarangkada ang duwelo ngayong alas-8 ng gabi bilang unang salang ng Beermen kontra sa Road Warriors na sabik makaganti matapos pumalya sa Phoenix Fuel Masters, 101-113.
Sa unang laro, magpapambuno ang Blackwater (1-1) at Terrafirma (0-1) sa alas-4 ng hapon.
Subalit ang atensyon ay nasa bangaan ng Beermen at Road Warriors, kasama ang NBA veteran na si Robinson.
Matatandaang si Robinson, No. 5 overall pick sa 2012 NBA Rookie Draft, ang siya sanang magsisilbing import ng SMB sa 2022 PBA Commissioner’s Cup bago nadale ng injury.
Napurnada ang tambalan ng dalawa bago mapunta sa NLEX ang pambatong reinforcement na nagpasiklab sa 26 points, 6 rebounds, 3 assists, 4 steals at 4 blocks sa unang salang kontra sa Phoenix.
Makakatapat ni Robinson si Ivan Aska na pumalit kay Tyler Stone bilang import ng SMB.
- Latest
