Sweet gihapon ang ex-gf

Dear Tito Miguel,

Ako diay si Angelo, taga Duljo Fatima,Cebu City, hangtod karon dili ko makalimot sa akong ex-girlfriend. Buwag na siya  sa iyang bana. Dako ang among gap sa edad, ako 27 siya  kay 40. Love namo ang usa'g- usa sa time nga  kami pa . Until now magsige  mig contact bisa'g dili na kami. Dili mawa iyang pagka-sweet hangtod karon  pero wala mi nagbalik. Rason sa panagbuwag namo kaniadto  tungod kay magsige  sila og contact sa  iyang bana ug ang rason kay alang ra daw sa ilang anak maong duna sila'y komunikasyon. Unsay angay nakong buhaton ? —Angelo

* * *

Angelo,

Piyong ug pagkuwenta. Inig ka 37 nimo, siya 50 na, inig ka 47 nimo, siya 60 na. Makita pa nimo imong kaugalingon kuyog niya nga luya na’g kunot samtang ikaw presko’g lagsik pa? Kun dili, buot pasabot dili na gugma imong gibati. Basin nangita lang ka’g mother figure o dili ba kaha ganahan lang ka sa iyang hitsura karon nga 40 na pero may asim pa. Pero ini’g ka senior citizen niya, sige lang ka’g agak.

Apan kun makita gihapon nimo imong kaugalingon nga magpangga ug mag-atiman niya, posible nahigugma gyud ka. Pero ayaw kalimti, ang pagbati mausab, sama sa hitsura. Karon kun desidido gyud ka niya, mahimo ninyo suwaya’g balik, labi na kun sa usa’g-usa kamo malipayon.  Buwag siya sa iyang bana, legal o dili? Kay kun wala pa ma-annul ilang kaminyoon, kumplikado ang sitwasyon nga imo balikon.

Gani, nasinati na nimo ang problema kaniadto, duna sila’y komunikasyon tungod sa ilang anak. Kun menor de edad pa ang bata, natural sila duha mogiya ug moatiman. Busa dili malikayan sige sila’g kontak o magkita. Apan kun hamtong na o dili ba kaha pamilyado na, nagkahilis na ilang responsibilidad, dili na sila mistil maghisgot pa bahin sa ilang anak. Busa siguroha, unsa estado sa ilang relasyon, angay pa ba sila mokontak sa usa’g-usa tungod sa ilang bata? Kay kun kinahanglan pa, mobalik gihapon ang rason ngano nagbuwag mo kaniadto. —Tito Miguel

Magpatambag ka? Ipada kang Tito Miguel: 0991-318-9366