Shetzue's Razor kampiyon gihapon sa TUF Basketball
CEBU, Philippines — Ang hait kaayong Shetzue's Razor mipakaging sa Chicken St., 85-77, aron paglangkat og duha ka sagunson nga kampiyonato sa TUF Basketball League Season 5 didto sa Benedicto College gym sa dakbayan sa Sugbo ning bag-ohay pa lamang.
Si Orly Amores maoy nangu sa Shetzue's Razor bitbit ang 15 puntos ug lima ka assists hinungdan sa pagbayaw kaniya nga Finals MVP. Mihimo sab og kasikas si Allen Tarona ilabi na sa depensa diin siya milangkat og 15 ka rebounds uban ang usa ka block ug usa ka steal alang sa Shetzue's Razor nga malampusong nakadepensa sa ilang trono.
Dominante kaayo ang Shetzue's gikan sa pagsugod sa duwa. Mibulhot sila sa sayong 27-17 nga labaw sa wala pa giinat ang ilang bentaha ngadto na sa 13 puntos, 54-41, sa halftime.
Ang Shetzue's nakamintinar sa double-digit nilang labaw apil na sa iskor nga 69-59 human sa tulo ka kuwarter. Wala na sila molingi pa sukad niadto.
Bugtong konsolasyon sa Chicken St. mao ang alas nilang si Syv Millevo nga maoy gipasidunggan nga season MVP.
Sa sangka alang sa ikatulong dapit, si Danny Nilas mipabuto og 28 puntos uban ang unom ka assists samtang si JP Alejandro miamot og 12 ka rebounds, duha ka blocks ug usa ka steal aron pangulohan ang RW Freight X Joher ngadto sa 85-79 nga pagpatikangkang sa AKP Cebu Ball Club.
- Latest
