Police Corporal Baculi gilubong na kagahapon

CEBU, Philippines — Gilubong na kagahapon si Police Corporal Ryan Languido Baculi, ang pulis nga nadestino sa Regional Police Drug Enforcement Unit (RPDEU) sa Police Regional Office(PRO)-7 nga gipusil patay samtang nagpahigayon og buy-bust operation sa Barangay Kinasang-an, siyudad sa Sugbo.

Gikan sa ilang panimalay sa Zaragoza, Lungsod sa Aloguindan gikarga sa mga kaubang police ang lungon ni Police Coporal Baculi paingon sa San Isidro Labradar Chapel nga sakop ra gihapon sa Barangay Zaragoza sa Lungsod sa Aloguinsan alang sa santos nga misa.

Human sa santos nga misa gihatod dayon sa iyang katapusang kapahulayan si Baculi didto sa Triumphant Cross Memorial Park sa dakbayan sa Carcar.

Ang mga kauban sa trabaho, kabanay ug mga classmates ni Corporal Baculi sa Batch Apostles ang mihatod sa lubong sa naasoy nga police.

Subay niini, si Police Lieutenant Colonel Gerard Ace Pelare, tigpamaba sa Police Regional Office-7 mipasalig nga dili sila mohunong hangtud nga mahatag ang hustisya ngadto sa namatay nga police. Padayon ang pagpangita sa kapulisan tibuok Rehiyon Siete sa mga suspetsado nga sila si Atong Rafols ug Ramil Salazar.

We are mourning and we will not stop until justice is served.  We salute the heroism of CPL Ryan Baculi and his sacrifice will never be in vain , sigon ni Police Lt. Col. Pelare.  (BANAT NEWS)