Nuggets daog apan Jokic, coach na-ejected

CEBU, Philippines —  Bisan og na-ejected ang alas nilang si Nikola Jokic ug head coach nga si Michael Malone, ang defending champion Denver Nuggets nakamaneho pagkulit og 107-103 nga daog batok sa Detroit Pistons sa NBA kagahapon adlawa didto sa Little Caesars Arena sa Detroit, Michigan. Si Jokic na-thrown out sa first half human napitohan og duha ka technical fouls tungod sa paglalis niini sa tawag sa reperi sa managlahing insidente.

Samtang si Malone na-ejected human nagpunay og reklamo sa usa ka tawag sa unang kuwarter pa lamang.

Bisan pa man niini, ang Nuggets nagmalampuson luyo sa pagpanginit nilang Reggie Jackson ug Kentavious Caldwell-Pope nga nagkumbinar og 41 puntos.

Sa laing duwa, si Giannis Antetokounmpo nagmangtas na sab uban ang 42 puntos, 13 ka rebounds ug walo ka assist aron ituboy ang Milwaukee Bucks ngadto sa 142-129 nga pagpatikangkang sa Washington Wizards.

Wala sab magpabitin sila si Damian Lillard ug Khris Middleton nga nagkumboya'g 40 puntos alang sa Bucks.

Didto sa Texas, ang San Antonio Spurs nasugamak sa ikasiyam nga sagunson nilang pilde human sila gibugha sa Los Angeles Clippers, 124-99.

Si Paul George maoy bida sa Clippers bitbit ng 28 puntos.     Ang gikaintapang rookie sa Spurs nga si Victor Wembanyama wala manimaho ning higayona ug naposasan ngadto lamang sa nuybe puntos.

Didto sa San Francisco, ang Golden State Warriors mipakgang sa unom ka sunod-sunod nilang pilde human giugbok ang Houston Rockets, 121-116.

Si Stephen Curry maoy migiya sa Warriors uban ang 32 puntos inabagan ni Klay Thompson nga milansang og lima ka tres sa iyang 20 puntos.