Nindot nga ideya

Dalaygon kaayo ang mga tag-iya og gasoline stations dinhi sa Cebu City kon motugot sila nga ang atubangan nga bahin sa ilang mga balay patigayon, ipagamit nga anha mopakanaog ingon man mopik-ap og mga pasahero ang mga public utility vehicles.

Mga 30 ka tag-iya og gasoline stations dinhi sa Cebu City nagpadala og ilang mga representante aron pagtambong sa miting didto sa Cebu City Hall kaniadtong Martes. Way misupak, apan angay natong hunahunaon nga sagad nila dili mga tag-iya.

Nindot ang paagi nila ni Raquel Arce, department head sa Cebu City Transportation Office, kay kon ang mga public utility vehicles anha na mopakanaog ug mopasakay g pasahero sa gasoline stations, dili na kaayo mabalda ang dagan sa trapiko sa karsada.

* * *

Suportahan nako ang nauyonan sa Sinulog 2024 Executive Committee nga ang kalihokan sa Sinulog Grand Parade sunod tuig sugdan sa alas 9 sa buntag, ug dili ka sa hapon na.

Unang gisugyot ni Cebu City Councilor Philip Zafra nga alas 3 na unta sa hapon sugdan ang pagsayaw, aron nga dili na kaayo init ang silaw sa adlaw kay maluoy sila sa mga dancers.

Apan matud ni Cebu City Councilor Joy Pesquera nga mosamot nga mag-antos ang mga dancers kon hapon na sugdan ang pagsayaw, kay kaadlawon pa nga sila momata ug mag-andam, unya magpaabot pa nga mahuman ang kalihokan nga maabtan gyud og tungang gabii.

Daan na nga gipahibawo ni Mayor Michael Rama nga anha gihapon sa SRP ipahigayon ang Sinulog Parade. Duna ko y sugyot nga kon ang South Coastal Road di man gihapon paagian og mga sakyanan atol sa Sinulog Parade, ang stage anha ibutang sa daplin sa dagat nga mag-atubang sa SM Seaside.

Nganong anha man diha? Nindot ang view nga dagat ang background sa stage nga anha manayaw ang mga dancers, og sigurado ko nga nindot kaayo tan-awon.

Magpili ang mga photographers kon ang i-background nila ang Nustar ba, o ang tulay sa CCLEX. Di ba nindot?

Tan-aw nako mas nindot kini nga view kay sa ang stage adto gihapon ipahimutang sa gibutangan sa miaging tuig. Unta, mahunahunaan kini sa atong mga opisyal, ilabi na ni Mayor Rama.

* * *

Gipakita na gyud sa United States nga kakumboya sila sa Pilipinas sa pagproteher sa West Philippine Sea. Gani, ang atong kasundalohan uban sa mga sundalo sa United States nagpahigayon og Joint Military Exercises sa maong dapit.

Klaro kaayo nga gipakita kini sa US aron pag-warning sa mga lider sa China nga dili nila yaga-yagaan lang ang Pilipinas nga maoy dunay katungod sa Kalayaan Island ug ubang dapit sa West Philippine Sea.