LeBron mikulit og laing kasaysayan

CEBU, Philippines — Si Los Angeles Lakers superstar LeBron James miangkon og laing dungog sa mabulokon niyang karera sa NBA.

Kini human si James nahimong labing unang player sa kasaysayan sa NBA nga nakapupo og 39,000 puntos.

Gikulit sa 38-anyos nga si James ang maong rekord human siya milansang og 3-pointer sa unang kuwarter atol sa ilang duwa batok sa Utah Jazz kagahapoing adlawa didto sa Crypto.com Arena nga ilang balwarti.

Si James, nga gilabyan si Kareem Abdul-Jabbar sa miaging season aron mamahimong all-time leading scorer sa NBA, misaludo sa mga fans human gi-anunsiyo ang iyang nakab-ot.

"I haven't really had an opportunity to wrap my head around what it means," matud pa ni James. "There's been so many great players in this league since the beginning of time, and so many great scorers.:

"To be able to be the first of anything is always pretty cool. A wild moment, for sure," dugang pa safour-time NBA champion.

Nadoble ang kalipay ni James gumikan kay gilampaso man sa Lakers ang Utah Jazz, 133-99, aron pagbira og luna sa quarterfinals sa labing unang NBA in-season tournament.

Si James mitapos uban ang 17 puntos samtang si Anthony Davis maoy nangu sa Lakers bitbit ang 26 puntos, 16 ka rebounds ug upat ka assists.

Sa laing bahin, si Kevin Durant mikatkat sa ika-11 nga puwesto sa NBA all-time scoring list sa dihang gibugha sa Phoenix Suns ang Portland Trail Blazers, 120-107.

Si Durant mihipos og 31 puntos aron labyan si Elvin Hayes uban ang 27,331 nga kinatibuk-ang puntos sa iyang karera.

Didto sa Atlanta, ang Indiana Pacers mipaksit sa Atlanta Hawks, 157-152, aron pag-abante sab sa knockout stage.

Si Tyrese Haliburton mibubo og 22 sa iyang 37 puntos sa ikatulong aron pangulohan pangulohan ang dalaygong pabbangon sa Pacers human malubong og 20 puntos sa first half aron pasukarapon ang Hawks.

Dako sab og natampo si Buddy Hield, nga mitali og 13 sa iyang 24 puntos sa katapusang kuwarter alang sa Pacers.

Sa Philadelphia, si Darius Garland mikolekta og 32 puntos sa dihang gipakuratan sa Cleveland Cavaliers ang 76ers sa overtime, 122-119.