Istrikta og dagway
Dear Tito Miguel.
Ako diay si Charlene, 21 anyos, taga Liloan, Cebu. Ingon sila, guwapa kuno ko, pero wala’y lalaki nga maka-dare og diskarte nako tungod kay istrikta kuno ko og dagway. Ingnon ko sa akong barkada, nagsagol ang akong kaguwapa ug istrikta nga dagway. Naa tu’y higayon nga giingnan ko sa akong kauban sa trabaho og, “ Charlene, naa baya’y naibog nimo nga workmate nato, apan wala modayon og panguyab nimo kay nahadlok siya sa imong pagka-istrikta , ma-intimidate siya nimo.” Wala pako kasuway og uyab Tito Miguel,tinoud kaha ang ilang giingon nga tungod ni sa kaistrikta sa akong dagway? —Charlene
* * *
Charlene,
Lagmit tinuod, kasagarang lalaki moatras kun ang babaye istrikta, utokan o dili ba kaha taas ang ranggo. Gusto nila sila ang hawod. Kun ilang tan-aw ikaw ang labaw, sila motalaw. Dili man gyud kaha ka istrikta, sa tan-aw lang nila. Kun natural na nimo nga hitsura, pasabot wala pa nimo makaplagi ang para nimo. Ang lalaki nga nakagusto ug interesado, samot mahagit nga moduol ug manguyab kanimo. Inay nga imong basolon imong kaugalingon nganong wala’y nanguyab nimo, gamita na nga barometro kun ang lalaki nakagusto ba gyud nimo. Kun gusto gyud ka maka-uyab, basin duna kay angay usbon sa imong nawong, usahay masaypan ka nga istrikta tungod sa porma sa imong kilay. O dili ba kaha nagsuot ka’g antipara.
Pero lagmit gikan gyud ni sa ilawom. Busa didto sugdi ang solusyon. Aron mogaan tan-awon imong nawong, pagaani imong paminaw. Hinumdomi ang mga nindot nimo nga kagahapon, tan-aw sa positibo nga aspeto sa imong kinabuhi. Kay hadlok man sila moduol nimo, ikaw ang magpaduol. Panagad. Ayaw pamili’g tawo, dapat patas imong pagtratar kanila maski unsa pa ilang estado sa kinabuhi.Sugdi sa imong gitrabahoan, una’g timbaya sa tanan, labi na sa mga nagtuo nga sila ultimo, sama sa security guard ug utility. Kinahanglan sinsero ka. Pahiyom gikan sa ilawom, mogawas sa imong mga mata nga ikaw sayon duolon. Sa maong paagi makita nila ang pikas nga bahin sa imong pagkatawo.Kun tinuod gyud nga istrikta ka, sabaan sige’g yawyaw, wala’y lalaki ganahan moduol ug maminaw.Hilom, apan pahiyom. Tito Miguel
Magpatambag ka? Ipada kang Tito Miguel: 0991-318-9366
- Latest