Hornets mipabugnaw sa Celtics

CEBU, Philippines —  Ang Charlotte Hornets nakasugakod sa 45 puntos nga gipabuto ni Jayson Tatum aron pakgangon ang unom ka sagunson nga daog sa Boston Celtics sud sa overtime, 121-118, sa NBA kagahapon didto sa Spectrum Center sa Charlotte, North Carolina.

Nindot unta ang gipakitang salida sa Celtics nga sa usa ka higayon naglabaw og 18 puntos sa ikaduhang kuwarter.

Apan sa hinay-hinay nakagukod ang Hornets hangtud nga nakapuwersa sila og overtime.

Sa dugang singko minutos, si Miles Bridges milansang og layo kaayong tres aron pagpalabaw sa Hornets, 119-116, sa pinal nga siyete segundos.

Si Tatum duna untay tsansa nga tablahon ang iskor apan mipasud lamang og duha sa tulo niya ka free throws sa nahibiling dos segundos.

Sa katapusang eksena sa duwa, si Gordon Hayward kalmadong mipasud sa duha ka krusyal niyang free throws aron silyohan ang makutas ug kulbahinam nga daog sa Hornets.

Si LaMelo Ball miposa og lima ka tres sa iyang 36 puntos aron pangulohan ang Hornets. Si Hayward midugang og 20 puntos, si Mark Williams mi-iskor og 18 samtang si Bridges miamot og 14 puntos.

Si Kristaps Porzingis mihipos og 17 puntos alang sa Celtics nga bisan og napilde padayong naghari sa Eastern Conference bitbit ang 11-3 nga baraha.