Gisamokan sa ex-boyfriend

Dear Tito Miguel,

Ako diay si Dianne , taga Guadalupe, Cebu City. Akong ex-boyfriend ba, kay sige gihapon og share sa Facebook sa among  throwback photos. Niabot og tulo ka tuig ang among relasyon ug nagkabuwag mi  niadtong Enero karong tuiga. Bisan unsaon og badlong, dili gyud mopatoo.  Unsa angayan nakong buhaton Tito Miguel ?  Dianne

* * *

Dianne,

Nasulod ka sa plastik. Sige siya g post sa inyo throwback kay nagpatagad nimo. Basin gusto makigbalik o gisungog lang ka. Kay nibadlong man ka, nakuha niya iyang gusto, ang imong atensyon. Kun sige ka g badlong, samot na mopadayon. Busa pasagdi, wa man kaha kay uyab karon nga magselos. Kun duna man, ipakita kaniya imong mga mensahe isip ebidensiya nga imo gibadlong apan dili mopatuo.

Kun wala kay uyab ug dili ra ngil-ad ang mga hulagway, pasagdi. Kun sweet kaayo mo sa throwback, pasagdi gihapon. Kay lagi kun imong badlongon, tabla ra nga nisumpay ka sa iyang gibuhat. Total moabot ra gihapon sa punto nga kapoyon siya. O dili ba kaha siya mismo moundang kun makauyab na g lain. Lagmit dili ka kumportable kay gipangutana ka sa mga tawo kun kamo pa ba diay tungod sa iyang gipatik nga mga hulagway. Ingna lang  nga siya ray nagbuot buot. Wala kay obligasyon mo-eksplikar sa mga tawo. Puede nimo ipaagi g binuang nga sikat man gud ka, busa sa publisidad gigamit ka. Ayaw seryosoha ka y ikaw ang alkanse. Mahanaw ra na g iyaha.

Apan kun di gyud ka mahimutang o makauwaw ang mga litrato, mahimo ka modangop sa abogado aron badlongon siya pinaagi sa suwat legal, baharan nga kun dili niya tangtangon ang mga post o iyang ipadayon, imo siya pasakaa g sumbong aron makabayad sa danyos kay nipatik sa imong hulagway sa wa y pananghid. Syaro g dili mahadlok. Konsulta g abugado aron sigurado.  Tito Miguel

Magpatambag ka? Ipada kang Tito Miguel: 0991-318-9366