Gibalibaran ang wedding proposal

Dear Tito Miguel,

Ako diay si Michael ,taga Mandaue City  ug naa nakoy uyab. Upat na ka tuig ang relasyon namo ni Jerra. Niaging buwan, ni-propose ko niya nga magpakasal , apan nibalibad siya . Napalaw ko Tito Miguel , wala ko kasabot kun nganong dili pa siya andam sa maong butang.  Dili man sad siya mohatag og explanation. Dili gyud ko mahimutang, unsa akong buhaton  aron hingpit nako nga madawat ang  iyang desisyon? — Michael

* * *

Michael,

Dili ka mahimutang, mora ka’g nagsalimoang, dili makadawat sa iyang  desisyon kay  walay explanation. Busa ikaw na lang tubag sa imong pangutana aron ka makamata sa kamatuoran. Kay dili  man siya mangatarungan, iyang buot pasabot wala na kay mapaabot. Ang babaye nga kanimo nahigugma mohatag gyud nimo’g garantiya. Ka’y dili man niya ipamulong, buot pasabot hasta siya wala kahibawo asa mo padulong. Wala kay mapaabot nga kaugmaon niya. Dili pa hingpit iyang gugma kanimo. Mao na’y labi’ng klaro. Ka’y kun iya’ng rason dili pa siya andam, unsa ma’y lain niya’ng gipangandaman? Pamilya, trabaho o tungod ka’y bata pa mo? Kun mao, unsa ma’y nakalisod pagpamulong ana nga sayon ra man unta na sabton ug istoryahan.

Lagmit ngil-ad ug makapasakit kanimo ang rason, ka’y nganong naglisod man siya’g pamulong. Dakong purohan dili ikaw iyang gipangita. Kun ikaw man kaniadto, nihupas na to. O dili ba kaha nakakita siya’g lain. Wa nimo giklaro kun uyab pa mo. Ka’y kun kamo pa, biya sa wa’y pananghid. Kun dili ka pangitaon, buot pasabot dugay na siya nagpaabot nga ikaw ang makasabot. Busa dawata ang kamatuoran nga wala niya gipamulong apan nilanog sa iyang lihok. Kun pangitaon ka, diha na paningla unsa gyud iyang rason o plano sa inyong relasyon. Lagmit mapugos na siya’g istorya kay siya na ma’y nigukod. Kun dili gihapon, unsa pa ma’y imong balikon nga sa imong mga pangutana naputos man siya sa kahilom? Tito Miguel

Magpatambag ka? Ipada kang Tito Miguel: 0991-318-9366