Engineer nagdala og tooter nga adunay residue sa shabu sikop

CEBU, Philippines — Nasikop ang usa ka civil engineer nga taga Las Pi as human kini nasakmiti og glass tooter nga adunay residue s atol sa final screening dihang paingon na kining mosakay og eroplano padulong sa kaulohan diha sa Mactan Cebu International Airport kagahapon sa kadlawon.

Si Engineer Eric Larga, 53-anyos kinsa nibakasyon sa Sugbo ang nasikop sa mga sakop sa Office for Transportation Security-DOTR Mactan Station, Philippine Drug Enforcement Agency-7 Airport Interdiction Unit ug PNP AVSEU-7.

Nasakmit sa kapolsan gikan kang Larga ang usa ka glass tooter nga adunay residue, improvised black scoop ug tulo ka lighter.

Atol sa pagsusi sa PDEA-7 chemist ngadto sa residue nga anaa sa glass tooter nasuta nga positibo kini sa shabu ug gisumiter kini ngadto sa PDEA-7 laboratory alang sa confirmatory  testing.

Matud sa kadagkoan sa PDEA-7 nakita sa final x-ray ang mga lighter sa bag sa suspetsado ug sa pag-abli adunay nakita nga case nga sulod ang glass tooter ug scope.

Kasong kalapasan sa Section 12 Article II sa Akta Republika 9165 kun   Comprehensive Dangerous Drugs Act of 2002  ang ipasaka  batok sa suspetsado.

Sa laing bahin, nasakmit  sa  kapolisan  sa Lapu-Lapu City Police Office (LCPO) ang 24.25 gramo nga shabu nga nikantidad tanan ngadto sa P164,900 base sa standard value  sa PNP.

Si Police Lieutenant  Colonel  Christian Torres, pangulo sa City Investigation Detection and Management Unit  (CIDMU) ug tigpamaba sa LCPO nagkanayon nga ang maong gidaghanon sa nasakmit nga shabu  ilaha kining nakuha gikan sa unom ka street level individual  nga pusher nga ilang nadakpan sulod sa usa ka semana nila nga operasyon.

Matud ni Torres nga sukad sa Nobyimbre 12 hangtud sa 18, 2023 napahigayon nila ang unom ka operasyon batok sa ilegal nga drugas.

Ang mga suspetsado nabalhog karon sa detention cell sa LCPO ug gikatakdang     pasakaan og tukmang kaso sa nahimo nilang kalapasan.

Si Torres nagkanayon nga gipahigayon usab nila ang operasyon batok sa ilegal nga sugal diin unom ka sugarol ang nasikop.

Naglakip sa unom ang nalambigit sa tigbakay, tong-it ug ilegal nga swertres.  (BANAT NEWS)