EDITORYAL - Basurahang mga barangay

Nahuman na gyud ang Barangay ug Sangguniang Kabataan Elections, duna nay mga bag-ong mamuno sa mga barangay, ang uban bagito pa sa tahas samtang duna puy nasublian sa ilang katungdanan.

Ini og kahitsas na unya sa tanan aron pagpahimutang kanila sa ilang mga pwesto ug mahatagan og tagsa-tagsa ka mga papel diha sa barangay, maaktibo unta sila sa panerbisyo sama sa pagkugi nila pagpanglamano ug pagpakigsandurot sa mga botante aron sila botaran. Usa sa gikinahanglan kaayo karon nga tutokan sa mga barangay ang ilang koleksiyon sa basura. Partikular na kaning mga barangay sa upat ka dagkong siyudad, ang Cebu City, Mandaue City, Talisay City ug Lapu-Lapu City.

Daghang mga barangay aning mga siyudara ang walay klaro ang waste disposal o koleksiyon sa basura.

Bisan duna nay higpit nga balaod ug ordinansa mahitungod niining hustong paghipos sa basura, duna pa gihapoy daghan nga malapason.

Gawas aning mga magpataka lang og labay og basura bisan asa, duna gyuy uban nga oras maoy bantayan aron magtambak og sinakong basura diha mismo sa kilid sa mga karsada.

Gibantayan ra nila kun mingaw na ang dalan ug walay makakita sa ilang pagtambak og basura.

Kini bisan og naa pay paskin nga naglatid kun unsa gyung orasa gitugot ang pagdala sa basura diha sa pick-up point sa daplin sa karsada, kasagaran ani kanang naa na ang garbage trucks.

Ang tumong niini, aron dili kuykuyon sa mga iro ang basura, dili makatag sa dalan ug dili manimaho nga hulga sa panglawas sa mga tawo diha sa palibot ug labaw sa tanan, makauuwaw kaayo sa mga turista ug mga dumuduong. Daghan kaayo ang problema sa mga barangay, pulos ni tanan prayoridad.

Apan aning talaan sa mga prayoridad, mas nag-una gyud sa ubang mga barangay nga kinahanglang unahon pag-atiman kaning bahin sa koleksyon sa basura ug pagdisiplina sa mga tawo.

Unta tutokan kini sa mga bag-ong mga opisyales sa barangay. Kay ang ilang lugar mura na og lapad nga basurahan apan walay nagtagad.