Call center agent nanghulga sa kanhi uyab sikop sa entrapment
CEBU, Philippines — Nasikop sa entrapment operation sa Regional Anti-Cyber Crime Unit (RACU)-7 ang usa ka lalaki nga giingong ni-blackmail sa iyahang kanhi uyab nga ipakita pinaagi sa tarpaulin ang hubo nga lawas niini apil ang nawong, chat messages ug hulagway sa usa ka kauban niini sa trabaho diha sulod sa usa ka establisamento sa Panagdait, Barangay Kasambagan, Siyudad sa Sugbo.
Ang mga personnel sa RACU-7 pinangulohan ni Police Lieutenant Mark Anthony Fredeluces nihimo og entrapment operation diin nasikop ang usa ka 32-anyos nga call center agent nga taga Plaridel Street, Barangay Cambaro, Siyudad sa Mandaue.
Nireklamo ang kanhi uyab sa suspetsado tungod kay gihulga niini ang biktima nga nga i-display ang giprinta nga tarpaulin nga anaa ang hubo nga lawas, nawong ug ngalan, apil na ang historical chats conversations ug hulagway sa usa ka kauban niini sa trabaho.
Giingong nanghulga pa ang suspetsado nga kon dili makigbalik ang biktima kaniya i-display niya ang tarpaulin diha sa I.T Park diin nagtrabaho ang biktima ug sa basketball court duol sa balay sa biktima.
Gikatakda nga pasakaan og kasong kalapasan sa Article 286 kun Grave Coercion sa Revised Penal Code, Akta Republika 9262 kun Anti-Violence Against Women and their Children Act of 2004 ug Akta Republika 9995 kun Anti-Photo and Video Voyeurism Act of 2009 in relation to Section 6 sa Akta Republika 10175 kun The Cybercrime Prevention Act of 2012 ang suspetsado kinsa nagtingkagol karon sa prisohan. Gipasalig sa RACU-7 nga magpadayon ug gihingusgan ang ilang partnership tali sa local PNP units, Local Government Units ug komunidad aron pagdakop sa mga pinangita sa balaod.
Kini subay na sa kamandoan ni Police Brigadier General Sidney Hernia, direktor sa PNP ACG aron makab-ot ang tinguha nga highly responsive ug dynamic unit alang sa luwas nga cyber environment. (BANAT NEWS)
- Latest