Baraha sa ICC
Kaniadto, bisan unsay sulti sa Makabayan bloc giisnab sa liderato sa House of Representatives. Karon, ang ilang pagsupak sa confidential funds (CF) niresulta sa pagpapas sa House sa P650 milyones nga CF sa Office of the Vice President (OVP) ug Department of Education (DepEd).
Kaniadto, bisan unsay awhag nga giluwatan sa Makabayan bloc wa hatagi og importansiya sa Malakanyang. Karon, ang ilang resolusyon pag-awhag sa administrasyon ni Presidente Ferdinand Marcos Jr. pagtabang sa imbestigasyon sa International Criminal Court (ICC) sa drug war seryuso nang gitun-an sa Department of Justice (DOJ).
* * *
Kay wa man mohunong si kanhi Presidente Rodrigo Duterte paghudlat ni House Speaker Martin Romualdez bisan nangayo ang DOJ og opisyal nga kopya sa resolusyon sa Makabayan, o tingali wa lang kasubay si Duterte sa ilang pasumbingay, alyado ni Romualdez ang nihimo og mas klarong lakang.
Si Kongresista Bienvenido Abante Jr., tsirman sa House Committee on Human Rights, nikopya sa nahaunang resolusyon sa tulo ka sakop sa Makabayan bloc: France Castro sa ACT, Arlene Brosas sa Gabriela ug Raoul Manuel sa Kabataan.
* * *
Aron pagsegurong makasabot ang mga Duterte nga silay gipahinungdan sa mensahe, gibanhaw sa DOJ ang ilang reaksiyon sa resolusyon sa Makabayan bloc: Matud ni Justice Secretary Boying Remulla nga ilang tun-an ang resolusyon ni Abante.
Samtang ang Makabayan resolution nitumbok sa pag-angkon ni Duterte nga iyang gigamit ang intelligence funds para sa extrajudicial killings, si Abante nitanyag og dugang mga sukaranan pagtabang sa ICC: Ang hukom sa Korte Suprema sa 2021 nga ang ICC dunay hurisdiksiyon sa mga krimen sa drug war; ug ang pakiglambigit sa administrasyong Marcos sa ICC.
* * *
Ambot unsa kaseryuso silang Romualdez ug Marcos sa paggamit sa ICC aron paghipos ni Duterte:
• Igo ba lang nanghudlat aron mohilom nang kanhi presidente? o
• Andam gyod nga mopasud sa Pilipinas sa mga imbestigador sa ICC aron manghipos og dugang mga ebidensiya ug maminaw sa dugang mga biktima, mga tagtungod ug mga saksi; ug
• Pagdakop ni Duterte ug sa iyang mga sinugo sa laktod nga pinatyanay sa 2011 hangtod sa 2019 (nga posibleng maglakip ni kanhi Justice Secretary Vitaliano Aguirre, Senador Bato dela Rosa ug, nakatag-an ka, Bise Presidente Sara Duterte Carpio)?
- Latest
