21 ka bus posibleng i-revoke and CPC

CEBU, Philippines — Pormal na nga gipaimbestigahan sa Probinsiya sa Sugbo ngadto sa Land Transportation Franchising and Regulatory Board (LTFRB) ang 21 ka bus nga nagbiyahe padulong sa habagatang bahin sa Sugbo.

Ug posibleng i-revoke o ikanselar ang certificate of public convenience sa maong mga bus.

Ang CPC usa kini ka authorization nga iluwat sa LTFRB alang sa operasyon sa mga land transportation alang sa publiko diin subay kini sa gilatid sa balaod.

Ang Kapitolyo niduso og reklamo human sa kanunay nga natala nga kalapasan sa mga bus ug minibus nga nag-operate diha sa Cebu South Bus Terminal (CSBT).

Matud sa Kapitolyo apil sa mga kalapasan ang ilegal nga pag-park ug ang pagpasakay ug pagpakanaog sa mga pasahero diha atubangan sa CSBT.

Niadtong buwan sa Hunyo karong tuiga, si Garcia nipatawag sa mga bus ug minibus operator nga nakalapas sa mga lagda sa trapiko diha atubangan CSBT.

Adunay gipakita nga footage sa Close Circuit Television (CCTV) si Garcia isip ebeidensiya.

Niadtong higayona gibaharan ni Garcia ang maong mga operator nga ang Kapitolyo mohangyo sa LTFRB nga kanselahon ang ilang prangkisa kon padayon nga molapas sa lagda ang maong mga bus driver.

Base sa taho sa Sugbo News, nga nihangyo ang mga operator nga dili sila multahan ug nisaad sa tibuok nga operasyon.

Apan naobserbahan nga padayon gihapon ang nahimong kalapasan ug gani adunay indibidwal nga namatay human nga naninguha nga makasakay tunga-tunga sa dalan niadtong Oktubre 17 niining tuiga.

Giunsa man tawon na ninyo og huna-huna? Makapuli pa mo atong kinabuhi nga nakalas? , matud ni Garcia ngadto sa mga operator atol sa ilang tigom niadtong Nobiyembre 21, 2023 diha sa Kapitolyo uban ni LTO-7 Director Glen Galario.

Samtang direktor sa LTRB-7 Eduardo Montealto, Jr. nisaad kang Garcia nga mohatag sa tukmang proseso ang ahensiya  ngadto sa mga operator ug mopatuman og tukma usab nga silot sa mga malapason. (BANAT NEWS)